காரைக்குடி அருகே ரூ.500 லஞ்சம் வாங்கிய இளநிலை பொறியாளர், லைன்மேன் கைது

காரைக்குடி, ஜூலை 19- காரைக்குடி அருகே உள்ள மணக்குடி மின் பகிர்மான அலுவலகத்தில் பணிபுரியும் இளநிலை பொறியாளர் சையது முகமது பாஷா (48). லைன்மேன் பஞ்சு (36). இவர்கள் புதிய வீட்டிற்கான மின் இணைப்பை மாற்றித் தருவதற்காக ரூ.500 லஞ்சம் பெற்றதாகக் கூறப்படுகிறது. இதுகுறித்து கிடைத்த புகாரின் பேரில், ராமநாதபுரம் லஞ்ச ஒழிப்புத்துறை துணைக் காவல் கண்காணிப்பாளர் ராமச்சந்திரன் தலைமையிலான அதிகாரிகள் மறைந்து இருந்து கண்காணித்தனர். அப்போது வீட்டு மின் இணைப்பு பெறுவதற்காக ரூ.500 லஞ்சம் பெற்றபோது, இருவரையும் கையும் களவுமாக பிடித்து கைது செய்தனர்.

இருவரிடமும் லஞ்ச ஒழிப்புத்துறை அதிகாரிகள் தீவிர விசாரணை நடத்தி வருகின்றனர். மேலும், ஊழல் தடுப்புச் சட்டத்தின் கீழ் வழக்குப் பதிவு செய்யப்பட்டு, நீதிமன்றத்தில் ஆஜர்படுத்த நடவடிக்கை மேற்கொள்ளப்பட்டு வருகிறது.