12.15 ஏக்கர் கோயில் நிலத்தை மீட்டுக் கொடுத்த அமைச்சர் டாக்டர் டி.கே. பிரபுவுக்கு கோயில் நிர்வாகிகள் நன்றி

காரைக்குடி, ஆக.28- காரைக்குடி அருகே உள்ள இலுப்பக்குடி சுயம்பிரகாசேசுவரர் கோவில் (தான்தோன்றீஸ்வரர்) கோவிலுக்கு சொந்தமான நிலங்கள் காரைக்குடி நகரின் பல்வேறு பகுதிகளில் உள்ளன. இதில் காரைக்குடி முடியரசன் சாலையில் உள்ள 12 ஏக்கர் 15 சென்ட் கோயில் நிலத்திற்கு முத்துராமலிங்கத் தேவர் நகரை சேர்ந்த எஸ்.பி.டி., கருப்பையா என்பவரது மனைவி தனலட்சுமி என்பவர் பட்டா பெற்றிருந்தார் பத்திரப் பதிவு அவர் பெயருக்கு செய்யப்பட்டிருந்தது. திடீரென்று தனலட்சுமி அந்த இடங்களை சுத்தப்படுத்தும் பணியில் ஈடுபட்டதால் பட்டா விபரம் கோயில் நிர்வாகிகளுக்கு தெரியவந்தது இதையடுத்து இழுப்பக்குடி கிராம மக்கள் மற்றும் கோயில் நிர்வாகிகள் காவல்துறையில் பட்டா போலியாக வழங்கப்பட்டுள்ளது என புகார் அளித்ததுடன், நீதிமன்றத்தையும் நாடினர்.

இந்த விவகாரம் தொடர்பாக கோயில் அறங்காவலர்கள் மற்றும் நிர்வாகிகள், காரைக்குடியில் கனிம வளத்துறை அமைச்சர் டாக்டர் டி.கே. பிரபுவை நேரில் சந்தித்து மனு அளித்தனர். மனுவை பெற்ற அமைச்சர், பட்டாவை ரத்து செய்து கோயில் நிலத்தை மீட்க உரிய நடவடிக்கை எடுக்க மாவட்ட நிர்வாகத்திற்கு உத்தரவிட்டதாக தெரிவிக்கப்பட்டது. அதன் தொடர்ச்சியாக 12 ஏக்கர் 15 சென்ட் கோயில் நிலம் மீண்டும் கோயில் தேவஸ்தானத்திற்கு கிடைத்ததாக கோயில் நிர்வாகிகள் தெரிவித்தனர். இதையடுத்து செய்தியாளர்களை சந்தித்த கோயில் அறங்காவலர்கள் மற்றும் நிர்வாகிகள், கோயிலுக்குச் சொந்தமான நிலத்தை மீட்டுக் கொடுக்க நடவடிக்கை எடுத்த கனிமவளத்துறை அமைச்சர் டாக்டர் டி.கே. பிரபுவுக்கு தங்களது நன்றியை தெரிவித்துக் கொண்டனர்.